Grunderhof

UrDinkel Kernotto... nahrhaft u gsung

Sit em 2017 verchoufe mir üses eigete UrDinkel-Chorn vouumfänglech diräkt aus säuber. Im 2018 si mir ir IG Dinkel biträte. E Inträssegmeinschaft wo sech drfür isetzt das das Chorn wieder Populär wird, sigs füre Konsumänt oder füre Buur.

Ds Kernotto isch eis vo üsne absolut liebscht UrDinkel Produkt.
Da wird üses Chorn im Nachbardorf zersch mau vom Spelz trennt. Aus zwöite Schritt wird das Chorn agschliffe, sprich dä Vorgang mach das d Keimhütli (Keimhaut) nüm dran si. So ischs nid nötig das me das Chorn über d Nacht muess ilege. Mi cha grad diräkt hinger z'choche.
Mir bietes i 3 versch. Grössi a. Ei Variante no mit tröchnetem Gmües, wo Grosi Käthi für üs produziert.
Zuebereite duet mes wi Risotto, es brucht eifsch chli lenger bis mes cha arichte. U es git ganz viu verschideni Choch- Variatione zum usprobiere...